ബസ്സ്‌ ഇറങ്ങുമ്പോൾ

ബസ്സ്‌ ഇറങ്ങുമ്പോൾ 
വിലപ്പെട്ടതെന്തോ നമ്മൾ മറന്നു വയ്ക്കുന്നുണ്ട്

ഇനിയൊരു യാത്രയിലും എടുത്തു പെരുമാറാൻ പറ്റാത്ത 
ഒരുകുന്നു കാര്യങ്ങൾ 

ബസ്സിറങ്ങുമ്പോൾ ആ യാത്രയിൽ മാത്രം 
കണ്ടുമുട്ടിയ മുഖങ്ങളെ,
ആ യാത്രയിൽ മാത്രം
കൂട്ടിമുട്ടിയ ശരീരങ്ങളെ,
തുഴഞ്ഞുണ്ടാക്കിയ ഇടങ്ങളെ,

ഇരുന്നുണ്ടാക്കിയ ഓരക്കാഴ്ചകളെ
ഇടം വലം കാലുകൾ മാറിമാറി
നിന്നുണ്ടാക്കിയ ഇടക്കാലാശ്വാസങ്ങളെ

സ്ഥിരം സൗഹൃദം എന്നപോൽ
യാത്രയുടെ അവസാനം വരെ മാത്രം
നീട്ടി നട്ടു നനച്ചു വളർത്തും
അരികു വക്രിച്ച ചിരികളെ

പെരും സൌരയൂഥത്തിലെ
ഒരേ ഗ്രഹത്തിലെ അന്തേവാസികൾ
എന്ന മട്ടിൽ
വഴിയോര തർക്കങ്ങളെ
തടയലുകളെ കല്ലേറുകളെ
കൊള്ളി വെയ്പ്പുകളെ

പുറത്തു പെയ്യുന്ന
മഴയെ വെയിലിനെ
വീശുന്ന കാറ്റിനെ
എതിര് കാത്തു പോകുന്ന
വണ്ടികളെ
ഒരേ ദയയോടെ
നോക്കുന്ന നോട്ടങ്ങളെ
ഒക്കെയും
ഒന്നിച്ചു ചിരിച്ച്
എതിർത്ത് കയർത്ത്
ചർച്ചിച്ച് തോൽപ്പിച്ച്
മുന്നേറും സമയങ്ങളെ

തൊട്ടയൽക്കാരൻ
ജനലിലൂടെ കൈവീശി
യാത്രചോദിക്കുന്ന
സൌഹൃദങ്ങളെ
പൊടിപിടിച്ച പരസ്യ ബോർഡുകളെ
അവയിലെ മഞ്ഞിച്ച മദാലസച്ചിരികളെ

ബസ്സ്‌ ഇറങ്ങുമ്പോൾ
വിലപ്പെട്ടതെന്തോ നമ്മൾ മറന്നു വയ്ക്കുന്നുണ്ട് ഒരുപാട്

ഇനിയത്തെ യാത്രയിൽ
തിരികെയെടുത്ത്‌ വിനിമയം ചെയ്യാനാവാത്ത
കാലഹരണപ്പെട്ട നാണയത്തുട്ടുകൾ
----------------------