നേരം

ഇന്ന് കാലത്തായിരുന്നു
ഒരു ഏഴ് ഏഴര മണിയായിക്കാണണം..

അത്രയേ ഉള്ളൂ സമയത്തിന്റെ കൃത്യത സുഹൃത്തേ...

അത് വരേയ്ക്കും നീ കാത്തു വച്ച
സമയ ക്ലിപ്തത 
ഇന്ന് കാലത്ത് ഒരു ഏഴിനും എഴരയ്ക്കും ഇടയിലെ
നീണ്ട മുപ്പതു മിനുട്ടുകളിൽ
ഉടഞ്ഞു തകർന്നു തലച്ചോറ് ടാർ റോഡിൽ
ചിതറും വിധം ആയത് നീ തന്നെ ശ്രദ്ധിച്ചു കാണും..

ഒരു ടിപ്പറോ പാഞ്ഞു തുള്ളുന്ന
ലിമിറ്റെഡ് സ്റ്റോപ്പോ
അരികു കാക്കാതെ പോയ ഓട്ടോറിക്ഷയോ
ഏതുമാകട്ടെ
നിന്റെ ഇത്രയും കാലത്തെ
സമയാനുബന്ധ ജീവിതത്തെ
ഒന്നുമല്ലാതാക്കിയത്‌ നീ ശ്രദ്ധിച്ചു കാണും

ഉണരാൻ ഉണ്ണാൻ ഇണചേരാൻ
അലാറമിട്ടു നീ കാത്തു വച്ച
സമയനിബന്ധനകളെയാണ്
ഇന്ന് കാലത്ത് ഒരു ഏഴ് ഏഴര
എന്ന നിശ്ചയമില്ലായ്മ
കൊഞ്ഞനം കുത്തുന്നത്

അല്ലെങ്കിൽ തന്നെ
ഇനിയെന്തിനു കൃത്യ സമയത്തിന്റെ
കൂട്ട് എന്ന ഉദാസീനതയുമാവാം
ഇങ്ങനെ ഒരു അലസ നോട്ടത്തിന്റെ അടിയിൽ.

നീയാണെങ്കിലോ
ഒരു നൂറു കൂട്ടം സമയം പറച്ചിലുകളുടെ
ദിവസം തുടങ്ങിയതേ ഉള്ളൂതാനും .

അതിപ്പോ ഏഴായാലെന്ത്
ഏഴര ആയാലെന്ത്
സ്റ്റോപ്പ്‌ വാച്ച് മുറിച്ചിടുന്ന
അതിനിടയിലെ
മറ്റേതെങ്കിലും നിമിഷമായാലെന്ത്

ഒരുപക്ഷെ
ചുടു ചോര ടാർ റോഡ്‌
മുഴുവനായും കുടിച്ചു തീരാനുള്ള
സമയമാവാം അത്
അതുമല്ലെങ്കിൽ
ഉള്ളിലേയ്ക്കിടിഞ്ഞിടിഞ്ഞു
ബോധം ഒരു കറുത്ത നക്ഷത്രമായ്‌
മരിച്ചു തീരാൻ എടുത്ത സമയവുമാവാം

മിടിച്ചു മിടിച്ച്
ലോകമേ ലോകമേ എന്ന്
കണ്ണ് കീറി
ഹൃദയം, ജീവിതം അളന്ന
സമയമാവാനും മതി.

എന്തായാലും ശരി
ഒരു ഏഴ് ഏഴരയായിക്കാണും
അതു തീർച്ച.
-----------