Escape Velocity

( അതിന്റെ കാവ്യമലയാളം കിട്ടാഞ്ഞത് കൊണ്ട് മാത്രം ആംഗലേയ തലക്കെട്ടിൽ )

മെല്ലെ
വളരെ മെല്ലെ
ഒരു ഉറുമ്പ് അരിക്കുന്നയത്ര
സാവകാശത്തിൽ
നിന്നെ പ്രേമിക്കണമെന്നു
വിചാരിക്കുന്നുണ്ട് ഞാൻ.

എന്റെ തന്നെ ഗുരുത്വാകര്ഷണ
അപകർഷതയെ
അതിജീവിക്കുവാനുള്ള
പ്രവേഗം അതിനില്ലാത്തത് കൊണ്ടാവണം
അതൊരു വിചാരം മാത്രമായ്
നിലനിന്നേ പോകുന്നത്

അതിജീവനവും മന്ദഗതിയും
നന്നായി സന്ധി ചേരുന്ന
ഏതോ ഒരു നാൽക്കവലയിൽ വച്ചു
നിന്നെ ഞാൻ പ്രണയിക്കും , തീർച്ച.

ഒരു പൂവ് ഇതൾ വിടർത്തുന്നയത്രയും
വേഗതയിൽ ഒരു ചുംബനം കൊണ്ട്..
--------------