ഒരണുകുടുംബ സെൽഫി

------------------------------------------

കരഞ്ഞുറങ്ങിയിരിക്കുന്നൂ

എനിക്കിനി സ്കൂളിലേ പോകണ്ട, 

വലുതാവണ്ട, 

കളിയ്ക്കണ്ട, 

കൂട്ടുകൂടണ്ട, 

രസിക്കണ്ടയെന്ന് പിണങ്ങി,

മകൾ

പുറത്ത് , മൂക്കൊലിപ്പിച്ചേ കരയുന്നൊരു 

സ്കൂൾ കുട്ടിയെപ്പോലെ, 

ജാലകത്തിന്നരികെ

 ഇരുളിനോടു ചേർന്ന് ചിണുങ്ങി,

രാത്രി

ചക്കിലിട്ടാട്ടിയാട്ടിയീ രാത്രിയെ 

വെളുപ്പിച്ചെടുത്തിട്ടു തന്നെ 

ബാക്കിയെന്ന് തിരിഞ്ഞുതിരിഞ്ഞേ 

തണുപ്പു വിതയ്ക്കുന്നുണ്ട്

ഫാൻ

നല്ലച്ഛനെങ്ങനെ വേണം

നല്ലമ്മയെങ്ങനെ വേണമെ-

ന്നോരോരോ പുസ്തകവും

ഗൂഗിളും തപ്പിത്തപ്പി

യുറക്കം വരാഞ്ഞ്

ഞാൻ.

നേരം വെളുത്തിട്ടു വേണം

അടുക്കളച്ചൂടിലീ സങ്കടം 

മൊത്തം കാഞ്ഞുതീർക്കാനെന്ന്

ഉറക്കത്തിലേയ്ക്ക് ചൂണ്ടയിടുന്നൂ,

അവൾ.