Uncertainty Principle

( അതിന്റെ കാവ്യമലയാളം കിട്ടാഞ്ഞത് കൊണ്ട് മാത്രം ആംഗലേയ തലക്കെട്ടിൽ )

ഒറ്റയ്ക്ക്
തലമാത്രം 
തലയുടെ തുമ്പ് മാത്രം 
വെളിപ്പെടുത്തി 
തുഴഞ്ഞു തുഴഞ്ഞു പോകുമ്പോഴും 
കുളമെന്ന
ഇളകാത്ത തിരശ്ശീലയിൽ
വരഞ്ഞിടുന്നുണ്ട് നീർക്കോലി
ഒരു വലിയ ഉടൽ സാധ്യത

പിറകിലേയ്ക്കെത്ര
ആഴത്തിലേക്കെത്ര
എത്രത്തോളം ഇത്ര
എന്നൊക്കെ ശങ്കിച്ചു ശങ്കിക്കാതെ..

ഒരു കുളത്തോളം
എന്ന സാധ്യതയെ
ഓളങ്ങളിലൂടെ
ചെറുതാക്കി
വലുതാക്കി..
-----------