ഇന്നലത്തെ മഴ

ഇന്നലെ പെയ്ത മഴയില്‍
കൊഴിഞ്ഞു വീണത്‌
പഴുത്ത ഇലകള്‍ മാത്രമല്ല.

മുറ്റം നിറയെ
പച്ചയിലകള്‍..
മണ്ണോടു ചേര്‍ന്ന്,
മാനം നോക്കി,
തണുത്ത ഹൃദയങ്ങള്‍ പോലെ..

ഒരില
ഭൂമിയില്‍ നിന്നും
അടര്‍ത്തിയെടുക്കുമ്പോള്‍
ചെളിയുടെ ചോരഞരമ്പുകള്‍ കണ്മിഴിക്കുന്നു.

ഇല തണുത്തതാണെങ്കിലും
അവയ്ക്കടിയിലെ മണ്ണിനു
ചോരച്ചൂട്..

സൂര്യനില്ലാത്ത മാനം
ഒരീറന്‍ തുണി .

പൂവിലോ
കായിലോ
മഴവില്ലിലോ
അല്ല പ്രണയം..

ഈ ഇലകളില്‍

ഭൂമിയോട് ചെവി കോര്‍ത്ത
ഈ ഇലകളില്‍..