മായ

---------
അങ്ങനെയങ്ങനെ
ജീവിതത്തിന്റെ കുത്തൊഴുക്കിൽ
ഒപ്പം ഒഴുകിയൊഴുകി
രോഗപ്പെട്ടും പെടാതെയും
സങ്കടപ്പെട്ടും പെടാതെയും
സന്തോഷപ്പെട്ടും പിന്നേം പെട്ടും
പൊടുന്നനെ അപ്രത്യക്ഷമാകാനാണ്
ഇക്കണ്ട പെടാപ്പാട് എന്ന് തിരിച്ചറിയുന്നൊരു
നാല്ക്കവല വരും.

അപ്പൊ ഇതൊക്കെ നിർത്തി
സന്യാസ ബുദ്ധനാവും
എന്നാണോ വിചാരം..?

ഏയ്‌ ,
പിന്നേം ഒഴുകും
പൊടുന്നനെ അപ്രത്യക്ഷമാകുമെങ്കിൽ
അത്രടം വരേം
എന്നൊരു ചങ്കൂറ്റവും പൊക്കിപ്പിടിച്ച്

അതല്ലേന്നും മായ?*
എന്നൊരു കളങ്കരഹിതച്ചിരിയുമായി..
-------------------------
*ഖസാക്കിലെ ചുമട്ടുകാരൻ പറഞ്ഞത്