എഴുന്നള്ളത്ത്

-----------------
മേള ബഹളങ്ങളോടെ
ഒരാനയെ
"നിൻറെ കാടിനെ നാടെടുത്തേ
നിൻറെ കാമനകൾ അറുത്തെടുത്തേ"
എന്ന് കവിളിൽ തോണ്ടിത്തോണ്ടി
ആനയിച്ചവഹേളിച്ച്
പാപ്പാന്മാർക്ക്
പള്ള നിറയെ കള്ളു കൊടുത്ത്
പ്രസന്നരാക്കി
നാടായ നാട്ടിലെ റോഡായ റോഡൊക്കെ
ബ്ലോക്കാക്കി
ആർമാദിക്കുന്നേരം

പാട്ടിൽ കൂട്ടുവരുന്ന കാടും
ഇരുട്ടിൽ പൂതലിച്ചു നില്ക്കുന്ന മലയും
കണ്ണിൽ കലങ്ങിക്കലങ്ങി
ആന കരയുന്നത്
കാണാറില്ല

അത് കണ്ണീർപ്പാടാണ് -
മദപ്പാട് തപ്പേണ്ടത്
ഇരുട്ടിൽ
സ്വന്തം കണ്ണുകളിൽ സുഹൃത്തേ..