മഴ

മഴ

രാവിലെത്തന്നെ

മുനിഞ്ഞുമുനിഞ്ഞ്

വോട്ട് ചെയ്തു കൊണ്ടേയിരിക്കുന്നു

വേനൽ വാട്ടിയ ഇലകളിലേയ്ക്ക്

പുകയും പൊടിയും തങ്ങി നിൽക്കുന്ന

കോൺക്രീറ്റ് മേൽക്കൂരകളിലേയ്ക്ക്

മഴയുടെ വിരലുകളിൽ

മഷിതേയ്ക്കാൻ കാത്തിരിയ്ക്കുന്നുണ്ട്

തൊടിയിലൊരു ഇലയില്ലാചില്ലയിൽ

നീലപ്പൊന്മാൻ

വോട്ടു കഴിഞ്ഞ് പെട്ടിയൊരുക്കാൻ തിടുക്കപ്പെടുന്നുണ്ട്

തെങ്ങിൻ തണ്ടയിലൊരു

ചിൽച്ഛിലണ്ണാൻ

മതിലോരത്ത് ഒരു ചുരുളൻ നായ

അടുക്കളപ്പുക പോലൊരു പൂച്ച.

വോട്ടു നിനക്കുള്ളതെന്ന്

കവിളത്തു തട്ടി

ചിരിച്ചു പെയ്യുന്നുണ്ടു മഴ

വെന്തു മലച്ച ഭൂമിയിലേയ്ക്ക്.