ഒരു വേനലിനും ഇടവപ്പാതിയ്ക്കും ഇടയിലെയൊരു വഴിയിൽ

...

ഒരു വളവു തിരിഞ്ഞ്

കയറ്റം കയറിയിറങ്ങുന്നത്

തണൽമരങ്ങൾക്കടിയിലേയ്ക്ക്.

നിറയെ പൂമണമുള്ള-

തണുകാറ്റിന്റെ തുണി

തോളത്തുരസിക്കടന്നു പോകുന്ന-

തെളിവെള്ളത്തിന്നൊഴുക്ക്

കാൽ തണ്ടകളിൽ

കുളിർ വളയങ്ങളിട്ടു തരുന്ന-

ഒരു തണലിടം.

പക്ഷെ ആ തിരിവൊരു

മുടിപ്പിൻ തിരിവാണ്.

അത്ര ജാഗ്രതയുള്ളൊരു

ഡ്രൈവർക്കുമാത്രം

ഒടിച്ചുവളച്ചെടുത്ത്

പൂർത്തിയാക്കാൻ പറ്റുന്ന

തരമൊരു തിരിവ്

ചരക്കു ലോറിയാണ്.

കാമനകളുടെ ചരക്കുഭാരം

തിരിച്ച് നിലത്തിറക്കേണ്ടിയിരിക്കുന്നു.

ഡ്രൈവർ

ഉറക്കത്തിലും.

---